Үзенчәлекле балалар өчен җилкәннәр йөздерү, велоярышлар һәм һөнәрчелек остаханәләре

«Игелекле Казан» проекты Халыкара балаларны яклау көненә багышланган инклюзия чаралары әзерли. Программага инвалид балалар һәм аларның гаиләләре өчен хәйрия, иҗади, бәйрәм һәм спорт чаралары кертелгән.

24 май көнне «Черек күл» паркында «Капитаннар клубы» проекты ярдәмендә гадәти хәйрия регатасы (җилкәннәр йөздерү чарасы) үткәрелә. Чара бишенче ел рәттән уздырыла һәм кичә барышында җыелган барлык акчалар ел саен «Игелекле Казан» проектларына ярдәм итүгә юнәлтелә.

Балаларны яклау көнендә, ягъни 1 июньдә, Үзенчәлекле һөнәрләр үзәгендә «Игелекле үзенчәлекле осталар үзәге» программасын ачу тантанасы көтелә. Бәйрәм көнендә инвалид балалар иҗади номерлар белән чыгыш ясап, һөнәрчелек остаханәләрендә һәм хәйрия ярминкәләрендә катнаша ала.

2 июнь көнне инклюзив «Тылсым» үзәге ишегалдында сәламәтлеге чикле һәм тайпылышлары булган балалар өчен зур интерактив бәйрәм әзерләнә. Чара аралашу, уртак уеннар һәм иҗади активлыкларда катнашу мәйданчыгы булачак.

9 июнь көнне «Елмай» паркында сәламәтлеге чикле балалар өчен оештырыла торган «Бәхетле мизгелләр» дип аталган велоярышлар җәйге сезон ачылышының төп вакыйгасы булачак. Биредә сәламәтлеге чикле балаларга 500 метр араны махсус велосипедларда узарга туры киләчәк. Әлеге күркәм гаилә бәйрәме ел саен 100 дән артык баланы берләштерә. Һәм ул велосипедта узышу чарасы гына түгел. Бу барлык яшьтәгеләр өчен зур гаилә бәйрәме санала.

Инклюзия юнәлешендә гаиләләргә ярдәм итүгә, уңайлы шәһәр мохитен үстерүгә һәм һәр балага шәһәр тормышында катнашу мөмкинлекләрен булдыруга юнәлдерелгән, Балаларны яклау көненә багышланган чаралар «Игелекле Казан» программасының зур бер җәйге өлеше булып тора.

Тулырак мәгълүматны «Игелекле Казан» проекты сайтында һәм 558-74-18 телефон номеры аша белергә була.